BISHITANTE KU TA TÈST POSITIVO PA COVID-19
Si bo ta di bishita na Kòrsou i bo tèst positivo pa COVID-19, sea na yega òf durante bo estadia, bo ta obligá di keda den isolashon pa mínimo 5 dia te ku un máksimo di 10 dia. Bo mester pasa sigur 24 ora sin ningun síntoma, promé ku bo sali for di isolashon.
E isolashon por tuma lugá na bo akomodashon, ku medidanan di protekshon i higiena nesesario. Ta importante pa bo informá personal di bo akomodashon òf kaminda bo ta hospedá, di moda ku nan tambe por tuma medidanan nesesario pa protekshon di nan personal i tambe otro bishitantenan.
Si bo tin síntoma di COVID-19 durante bo bishita na Kòrsou, bo por hasi un ‘zelftest’ pero fabor tuma kontakto ku un dòkter di kas si bo síntomanan bira grave. Na resepshon di bo hotèl òf bo serka e persona di kontakto di bo akomodashon, bo por risibí informashon kua dòkter por yama.
Isolashon ta nifiká:
- Keda kas/na e lokalidat kaminda ta keda
- Evitá kontakto físiko ku otronan
- No por risibí bishita
- No por bai trabou, skol, tienda, botika ètsetera
- Un famia òf amistat mester hasi kompra p’abo i laga esaki riba bo balkon
Kiko si por?
- Sinta den balkon òf kana den kurá bo so
- Traha òf sigui lèsnan di skol online for di kas/na e lokalidat kaminda ta keda
- Keda den kontakto ku sernan kerí via telefòn òf yamada ku video
Si bo ta sinti bo kurpa malu òf bo tin mester di remedi, tuma kontakto telefóniko ku un dòkter di kas òf pidi asistensia di bo akomodashon.
UZO DI DCC (QR CODE)
E prueba di bakunashon digital (DCC) ta un dokumento digital ku ta indiká si un hende ta bakuná kontra COVID-19. Bo por apliká pa e DCC di Kòrsou na momentu ku bo a risibí tur dos bakuna na Kòrsou i ta kompletamente bakuná, pues 2 siman despues di a risibí bo di dos bakuna. Solamente personanan ku a bakuná lokal por apliká pa e DCC QR Code di Kòrsou.
Kòrsou su DCC ta konosí i aseptá den Reino Hulandes i Union Oropeo tambe. E DCC ta trahá den forma di un ‘QR Code’ ku ta únikamente diseñá pa kada persona. Por uza e ‘QR Code’ lokalmente na momentu ku kier partisipá na un aktividat di riesgo haltu òf na momentu ku ta biaha pa paisnan den Reino Hulandes i demas paisnan den Union Oropeo. Promé bo biaha, chèk riba e wèpsait https://reopen.europa.eu/en si bo por usa e DCC di Kòrsou na e destinashon ku bo ta bai. Bo por usa e DCC QR Code di Oropa tambe pa bishitá eventonan na e destinashon ku bo ta bai. Bo mester kumpli ku e reglanan lokal pa esaki.
Ta obligatorio pa hasi uso di e ‘QR Code’ na momentu ku ta partisipá na eventonan di riesgo haltu. Na entrada di e evento ta registrá kada persona dor di ‘scan’ e ‘QR Code’ huntu ku un identifikashon bálido.
Por apliká pa e DCC di Kòrsou via www.curacaohealthapp.com.
OFISINA DI TURISMO DI KÒRSOU
Tur fasilidatnan turístiko na Kòrsou ta sigui e instrukshonnan di “A Dushi Stay, the Healthy Way’ pa garantisá siguridat di tur bishitante i personanan ku ta laborá den e sektor, mientras ta lagabo sintibo bon biní den un atmosfera relahá i protehá.
Por fabor bishitá www.curacao.com pa tur otro informashon relevante pa bo estadia na Kòrsou.
